नई दिल्ली: दिल्ली, हरियाणा आ महाराष्ट्र मे भाजपा शानदार जीत हासिल केलक अछि। आब सबहक मोन मे बस एकटा प्रश्न अछि जे भाजपा के अगिला राष्ट्रीय अध्यक्ष के हेताह? राष्ट्रीय अध्यक्ष के नाम के संबंध मे अखनो भेग बनल अछि। मुदा एहि बीच एकटा पैघ जानकारी सामने आयल अछि जे 15 मार्च सँ पहिने अध्यक्ष के नाम के घोषणा कएल जा सकैत अछि ।
भाजपा के अगिला राष्ट्रीय अध्यक्ष के घोषणा जल्द भ’ सकैत अछि। सूत्रक अनुसार अगिला दू सप्ताहक भीतर ई घोषणा कएल जा सकैत अछि। पार्टी के संगठनात्मक चुनाव 12 राज्य मे पूरा भ’ गेल अछि आओर मानल जा रहल अछि जे 15 मार्च सँ पहिने अध्यक्ष के नाम के घोषणा कएल जा सकैत अछि कारण बाद हिन्दू पंचांग के अनुसार अशुभ काल शुरू होइत अछि |
चुनाव मे जाए वाला राज्य सब पर भाजपा कें अछि नजरी
भाजपा कें राष्ट्रिय अध्यक्ष चुनबा लेल कम सँ कम आधा राज्य मे संगठनात्मक चुनाव संपन्न भेनाइ अत्यंत आवश्यक अछि। एहि सँ पहिने बूथ, मंडल आ जिला स्तर पर चुनाव होइत अछि। वर्तमान स्थिति मे 36 मे सँ मात्र 12 राज्य मे चुनाव पूरा भ’ चुकल अछि। एहि लेल कम सँ कम 6टा आओर राज्य मे चुनाव करबाक जरूरत अछि। भाजपा एहि प्रक्रिया कें तेजी सँ आगू बढ़ा रहल अछि, जतय अगिला साल विधानसभा चुनाव होबय वाला अछि, जेना तमिलनाडु, बंगाल, असम आ गुजरात। एहि साल कें अंत तक चुनाव होबय वाला बिहार मे कोनो बदलाव नहि होएत।
पार्टीक ध्यानाकर्षण की अछि ?
भाजपा अध्यक्ष पद के उम्मीदवार के चयन बहुत बात के ध्यान मे राखि कएल जाएत। सबस पैघ गप इ अछि जे कोन उम्मीदवार कें राष्ट्रीय स्वयंसेवक संघ सहित सबहक समर्थन भेटैत अछि। संगहि, उम्मीदवार के संगठनात्मक मूल्य सँ ओतप्रोत रहय पड़त, पार्टी जाति समीकरण, उत्तर-दक्षिण भाषा विवाद, परिसीमन आ सबस महत्वपूर्ण बात उत्तर प्रदेश मे अपन आधार मजबूत करबा पर ध्यान देत। उत्तर प्रदेश मे लोकसभा चुनाव मे पार्टी कें झटका लागल छल, जाहि कारण सँ पार्टी कें सदन मे पूर्ण बहुमत नहि भेट सकल छल ।
दक्षिण भारतीय भ’ सकैत छथि , भाजपा कें राष्ट्रिय अध्यक्ष !
मीडिया सूत्र के कहनाय छनि जे पिछला लोकसभा चुनाव मे कर्नाटक के अलावा दक्षिण के दोसर राज्य मे भगवा के समर्थन बढ़ला सँ उत्साहित भाजपा दक्षिण के एकटा चेहरा पर दांव लगा सकैत अछि। जं इ संभव भेल त केंद्रीय मंत्री जी किशन रेड्डी, बंदी संजय कुमार आओर प्रहलाद जोशी मे सँ एकटा के भाजपा के नवका राष्ट्रीय अध्यक्ष चुनल जेबाक प्रबल संभावना अछि। 2000 सँ 2004कें बीच दक्षिण भारत सँ भाजपा कें लगातार तीनटा अध्यक्ष छलाह – बंगारू लक्ष्मण (तेलंगाना), जन कृष्णमूर्ति (तमिलनाडु) आ वेंकैया नायडू (आंध्र प्रदेश) । अहि कें उपरांत पिछला 20 वर्ष मे राष्ट्रिय अध्यक्ष कें पद पर उत्तर भारत भाजपा कें सदस्य लोकनि भाजपा कें नेतृत्व क’ रहला अछि ।
