नई दिल्ली/ एहि बेर सऊदी अरबमे गर्मीक लहरि हज यात्रीसभ पर तबाही मचा देलक अछि। एखन धरि कमसँ कम 22 तीर्थयात्रीक मृत्यु भऽ चुकल अछि। मृत्युक बाद तीर्थयात्रीसभक शवकेँ सड़कक कातमे रौदमे रखबाक लेल सऊदी सरकारक आलोचना कयल गेल अछि।
दुनियाक सबसँ पैघ धार्मिक तीर्थस्थलमेसँ एक सऊदी अरबक हज यात्रा एहि बेर भयंकर गर्मीक सामना कऽ रहल अछि। एहि साल हज यात्राक दौरान लूक कारण कमसँ कम 22 तीर्थयात्रीक मृत्यु भऽ गेल अछि। मृत्युक बढ़ैत संख्या सऊदी अरब सरकारक हज यात्राक तैयारीक दावाकेँ उजागर कऽ देलक। स्थिति एहन अछि जे तीर्थयात्रीसभक शवकेँ चिलचिलाइत घाममे सड़कक कातमे राखय पड़ैत अछि। रविदिन जॉर्डनक समाचार एजेंसी खबरि देलक जे हज यात्रा पर जयबाक क्रममे देशक 14 तीर्थयात्रीक लूक आघातसँ मृत्यु भऽ गेल छल। एम्हर सऊदी अरबक स्वास्थ्य मंत्रालय कहलक जे लू आघातक 2700 सँ बेसी मामिला दर्ज कयल गेल अछि।
एकटा वीडियो सेहो वायरल भेल अछि जाहिमे कतेको मृत शरीरकेँ सड़क डिवाइडर आ फुटपाथपर राखल देखल जा सकैत अछि। मुदा, एहि वीडियोक पुष्टि स्वतंत्र सूत्र द्वारा नहि कयल गेल अछि। मिस्रक ६१ वर्षीय तीर्थयात्री अजा हामिद ब्राहिम मीडियाकेँ कहलनि जे ओ लाशकेँ सड़कक कातमे पड़ल देखलनि। लगैत छल जेना कयामत के दिन आबि गेल होइ। लोक सोशल मीडिया पर पैघ संख्यामे मृत्यु आ ओकर बाद शवक कुप्रबंधनक लेल सऊदी अरबक आलोचना कऽ रहल छथि।
सऊदी मौसम विज्ञान सेवाक अनुसार, सोमदिन मक्काक भव्य मस्जिदमे तापमान ५१.८ डिग्री सेल्सियस धरि पहुँचि गेल। तीर्थयात्री एहि ठाम काबाक परिक्रमा करैत छथि। ग्रैंड मस्जिद लग स्थित मीनामे तापमान ४६ डिग्री सेल्सियस छल। एहि ठाम हज यात्री तीनटा कंक्रीटक देबाल पर शैतानकेँ पत्थर मारबाक अनुष्ठान करैत छथि। एतय गर्मी आ भीड़ स्थिति के भयावह बना देलक। तीर्थयात्री गर्मीसँ बचबाक लेल अपन माथ पर पानिक बोतल ढारि रहल छलाह। शैतानकेँ पत्थर मारबाक अनुष्ठानकेँ हज यात्राक अन्तिम चरण मानल जाइत अछि। एकर बाद तीर्थयात्रीसभक हज यात्रा समाप्त भऽ जाइत अछि।
जॉर्डनक विदेश मंत्रालय रविदिन कहलक जे जॉर्डनक १४ तीर्थयात्रीक मृत्यु अत्यधिक गर्मीक कारण भेल छल, जखन कि १७ गोटे लापता छलाह। ईरान पाँच तीर्थयात्रीक मृत्युक सूचना देलक अछि मुदा कोनो कारण नहि देलक अछि। सेनेगल मे तीन टा मृत्यु के सूचना भेटल अछि। सऊदी अरबमे इंडोनेशियाक स्वास्थ्य मंत्रालयक एकटा अधिकारीक कहब छनि जे हजक दौरान इंडोनेशियाक १३६ तीर्थयात्रीक मृत्यु भऽ गेल अछि, जाहिमे कमसँ कम तीनटा लूक आघातसँ भेल अछि। एहि बेर भारतसँ १ लाख ७५ हजार तीर्थयात्री पवित्र हज यात्राक लेल सऊदी अरब पहुँचलाह।
एहि मामिलामे अरब सरकार दिससँ कोनो आधिकारिक बयान नहि आयल अछि। एतय भारतक कोनो अधिकारी इहो नहि बतौलनि अछि जे मक्का तीर्थयात्रा पर गेल कतेक भारतीयक मृत्यु भेल अछि। एहिसँ ई अनुमान लगाओल जा रहल अछि जे भारतक तीर्थयात्री सुरक्षित छथि।
