लाहौर/ पाकिस्तानमे कानून प्रवर्तन एजेंसीसभ द्वारा अल-कायदाक एकटा प्रमुख कमांडरकेँ गिरफ्तार कयल गेल अछि। कहल जाइत अछि जे उक्त चरमपंथी अमीन-उल-हक अछि। अल-कायदाक कार्यकर्ताकेँ शुक्रदिन पाकिस्तानक पंजाब प्रांतसँ गिरफ्तार कयल गेल छल। पकड़ल गेल आतंकवादी ओसामा बिन लादेनक घनिष्ठ सहयोगी अछि।
पंजाब पुलिसक आतंकवाद निरोधक विभाग (सीटीडी)क एकटा प्रवक्ता कहलनि जे आतंकवादक विरुद्ध लड़ाईमे महत्वपूर्ण सफलता भेटल अछि किएक तँ विभाग विभिन्न खुफिया एजेंसीसभक सङ्ग पंजाब प्रांतमे एकटा नियोजित अभियानक दौरान हककेँ गिरफ्तार कयलक।
एकटा पुलिस प्रवक्ता एकटा बयानमे कहलनि जे हक १९९६ सँ ओसामा बिन लादेनक घनिष्ठ सहयोगी छलाह आ कथित रूपसँ प्रांतमे विध्वंसक गतिविधिक योजना बनौने छलाह आ महत्वपूर्ण प्रतिष्ठान आ व्यक्तित्वकेँ निशाना बनबय चाहैत छलाह।
एहिमे कहल गेल अछि जे सीटीडी नीक प्रदर्शन कयलक आ अमीनुल हकक पता लगयबामे आ गिरफ्तार करबामे सफल रहल। सीटीडी गिरफ्तार आतङ्कीक विरुद्ध मामला दर्ज कयलक अछि आ ओकरा पूछताछक लेल अज्ञात स्थानपर स्थानान्तरित कऽ देल गेल अछि।
हकक नाम संयुक्त राष्ट्रक अन्तर्राष्ट्रीय आतंकवादी सूचीमे शामिल कयल गेल अछि। प्रवक्ता कहलनि जे हकक गिरफ्तारी पाकिस्तान आ ओकर विश्वव्यापी आतंकवाद विरोधी अभियानमे एकटा पैघ सफलता छल।
