तिरुवनंतपुरम/ भूस्खलनक घटनाक बाद एतय एकटा स्वास्थ्य केन्द्रमे मृत शरीरक कतारक बीच लोक अपन प्रियजनकेँ तकैत देखल गेल। जतय किछु लोक रिश्तेदारक मृत शरीर देखि कटु कानय लगलाह, ओतहि किछु गोटे ओहिमे अपन कोनो प्रियजनक शव नहि पाबि सुरक्षित रहबाक आशामे सुखक सांस लेलनि।
मंगलदिन वायनाड जिलाक मेप्पाडी गामक एकटा स्थानीय सामुदायिक स्वास्थ्य केन्द्रमे एकटा भयावह दृश्य देखल गेल। जिलामे भूस्खलनक घटनामे ९३ गोटेक मृत्युक सूचना अछि। एखन धरि दूटा व्यक्तिकेँ मलबासँ जीवित बाहर निकालल जा चुकल अछि। लगभग २५० लोककेँ सुरक्षित स्थानपर पहुँचाओल गेल अछि।
केरलक वायनाड जिलामे भारी बरखाक कारण भेल भारी भूस्खलनमे मृतकक संख्या ९३ भऽ गेल अछि। मुख्यमंत्री पिनराई विजयन मंगलदिन साँझ ई आंकड़ा जारी कयलनि। ष्वायनाडमे भेल भूस्खलन हृदय विदारक आपदा अछि। बहूत भारी बरखा भेल। पूरा क्षेत्र नष्ट भए गेल अछि। हम एखन धरि ९३ गोट शव निकालि चुकल छी, मुदा संख्या बदलि सकैत अछि। 128 लोक घायल छथि, जिनकर इलाज चलि रहल अछि।
केरलक मुख्यमंत्री पिनराई विजयन कहलनि जे केरल बैंक पहिनेसँ सीएमडीआरएफमे ५० लाख टाकाक योगदान दऽ चुकल अछि। सिक्किमक मुख्यमंत्री २ करोड़ आ तमिलनाडुक मुख्यमंत्री एमके स्टालिन ५ करोड़ टाका देबाक वचन देलनि अछि। राज्य दू दिनक आधिकारिक शोकक घोषणा कयलक अछि। सार्वजनिक समारोह आ उत्सव स्थगित कऽ देल गेल अछि। विजयन कहलनि, ष्हमसभ अनुरोध करैत छी जे शोकक अवधिमे राष्ट्रीय ध्वज आधा झुकल रहय।
मंगलदिन भोरमे मेप्पाडीक समीप पहाड़ी क्षेत्रमे भूस्खलन भेल, जाहिमे मुण्डाक्काई, चुरालामाला, अट्टमला आ नूलपुझा गाम सबसँ बेसी प्रभावित भेल। कतेको लोकक मलबामे दबि जयबाक आशंका अछि आ भारी बरखाक कारण बचावक प्रयासमे बाधा आबि रहल छल। केरल राज्य आपदा प्रबंधन प्राधिकरण (केएसडीएमए) प्रभावित क्षेत्रमे अग्निशमन दल आ राष्ट्रीय आपदा मोचन बल (एनडीआरएफ)क टीम तैनात कयलक। एनडीआरएफक एकटा अतिरिक्त दल वायनाड जा रहल अछि। बचाव प्रयासमे सहायता लेल कन्नूर रक्षा सुरक्षा कोरक दूटा दल सेहो तैनात कयल गेल अछि।
वायनाडक भूस्खलन पर केरलक अल्पसंख्यक मामिलाक राज्य मंत्री जॉर्ज कुरियन कहलनि जे प्रधानमंत्री नरेन्द्र मोदीक भोरसँ प्रधानमंत्री स्थितिक बारीकी सँ निगरानी कऽ रहल छथि, घटनाक्रमक जायजा लऽ रहल छथि आ एनडीआरएफ आ अन्य बलकेँ तत्काल बचाव अभियान शुरू करबाक निर्देश दऽ रहल छथि। केरलक भीतर आ बाहरसँ सेना जुटाओल गेल अछि। वायुसेना आ सेना सेहो राहत कार्यमे लागल अछि। कतेको भूभागमे पहुँचबाक लेल हेलीकॉप्टर आ अतिरिक्त सहायताक आवश्यकता होइत छैक। राज्य सरकार सेहो केन्द्रसँ सहायता मँगने अछि।
लोकसभामे प्रतिपक्षक नेता आ कांग्रेस सांसद राहुल गाँधी कहलनि जे ओ वायनाड जाएब। ओ ओतए जायत आ स्थितिक जायजा लेताह। कांग्रेस पार्टी द्वारा जारी एकटा आधिकारिक अधिसूचनामे कहल गेल अछि जे प्रियंका गाँधी सेहो वायनाडक दौरा करतीह।
लोकसभामे प्रतिपक्षक नेता आ कांग्रेस सांसद राहुल गाँधी कहलनि जे वायनाडमे आइ भोरे-भोर कतेको विनाशकारी भूस्खलन भेल। 50 सँ बेसी लोक मारल गेल अछि। मुंडक्काई गामक संपर्क टूटि गेल अछि आ त्रासदीक पैमाना एखन धरि जनहानि आ व्यापक क्षतिक आकलन नहि कऽ सकल अछि। हम केरलक रक्षा मंत्री आ मुख्यमंत्रीसँ गप्प कयने छी। हम केन्द्र सरकारसँ अनुरोध करैत छी जे मृतककेँ बचाव आ चिकित्सा देखभाल, तत्काल क्षतिपूर्ति लेल हरसंभव सहायता प्रदान कयल जाय।
केरलक राजस्व मंत्री के. राजन जनतब देलनि जे एनडीआरएफ, अग्निशमन आ राजस्व विभागक टीम सक्रिय रूपसँ काज कऽ रहल अछि। एखन धरि लगभग १०१ लोककेँ बचा लेल गेल अछि। कलपेट्टाक बाथेरीमे सेंट मैरी एसकेएमजे स्कूलमे एकटा आश्रय शिविर स्थापित कयल गेल अछि। घटनास्थल पर चिकित्सा दल आ एम्बुलेंस अछि, आ भोजन आ कपड़ाक व्यवस्था कयल गेल अछि। माटि खोदबाक मशीनक तत्काल आवश्यकता अछि।
केरल सरकार चुरामालामे भारी भूस्खलनक बाद भारतीय सेनाक १२२म इन्फैंट्री बटालियन (टीए) मद्रासक बचाव दलकेँ बजौलक अछि। चलि रहल बचाव प्रयासमे सहायता लेल एकटा चिकित्सा अधिकारी, दूटा जेसीओ आ ४० सैनिकक एकटा दल तैनात कयल गेल अछि।
मुख्यमंत्री पिनराई विजयन वायनाडक भूस्खलनक मद्देनजर आइ निर्धारित सभटा सरकारी कार्यक्रमकेँ रद्द करबाक लेल कहलनि अछि। एम्हर पलक्कड़ प्रशासन अगिला आदेश धरि जिलामे खनन पर रोक लगा देलक अछि।
भारतीय सेना, कन्नूरक डीएससी केंद्र वैथिरी तालुकमे फँसल लोक आ सरकारी कर्मचारीकेँ बचाबय लेल दूटा बाढ़ि राहत दल तैनात कयलक अछि। भारतीय नौसेनाक रक्षा सुरक्षा कोरक कर्मी खोज आ बचाव अभियानक लेल भूस्खलन स्थल दिस बढ़ि रहल छथि। आईएमडी मलप्पुरम, कोझिकोड, वायनाड, कन्नूर आ कासरगोडक लेल भारी बरखाक चेतावनीकेँ बदलि श्लालश् कऽ देलक अछि। एर्नाकुलम, इडुक्की, त्रिशूर आ पलक्कड़क लेल ऑरेंज अलर्ट जारी कयल गेल अछि।
प्रधानमंत्री नरेन्द्र मोदी मंगलदिन केरलक वायनाड जिलामे भूस्खलनमे जनहानि पर दुख व्यक्त कयलनि आ मुख्यमंत्री पिनराई विजयनकेँ संकटसँ निपटबाक लेल केन्द्रसँ हरसंभव मदतिक आश्वासन देलनि। प्रधानमंत्री मृतकक परिजन सभकेँ २-२ लाख टाकाक अनुग्रह राशि देबाक घोषणा सेहो कयलनि। घायल के 50,000 रुपया देल जाएत।
अमित शाह अपन एक्स अकाउंटपर एकटा पोस्टमे लिखलनि जे हम केरलक वायनाडमे भेल भूस्खलनक घटनासँ बहुत चिन्तित छी। जीएफ युद्ध स्तर पर खोज आ बचाव अभियान चला रहल अछि। दोसर टीम प्रतिक्रिया अभियानकेँ आओर मजबूत करबाक लेल चलि गेल अछि। मृतकक परिवारक प्रति हमर संवेदना आ घायलक शीघ्र स्वास्थ्यलाभक कामना करैत छी।
अधिकारीलोकनि कहलनि जे मुंडक्काई, चुरालामाला, अट्टमला आ नुलापुझा गाम भूस्खलनसँ प्रभावित आ कटल क्षेत्रमे शामिल अछि। जिला अधिकारीसभक अनुसार, भूस्खलनक कारण कतेको परिवारकेँ अलग-अलग शिविर वा हुनक रिश्तेदारक घरमे स्थानान्तरित कऽ देल गेल अछि।
भूस्खलनक कारण ट्रेन संख्या १६३०५ एर्नाकुलम-कन्नूर इंटरसिटी एक्सप्रेस त्रिशूरमे रोकि देल गेल अछि। ट्रेन संख्या १६७९१ तिरुनेलवेली-पलक्कड़ पलरुवी एक्सप्रेसकेँ अलुवामे रोकल गेल अछि आ ट्रेन नम्बर १६३०२ तिरुवनंतपुरम-शोरानूर वेनाड एक्सप्रेसकेँ चलाकुडीमे रोकल गेल अछि।
